ភ្នំពេញ៖កម្ពុជាបានផ្តល់ជំនួយមនុស្សធម៌ចំនួន៣សែនដុល្លារអាមេរិកជូនដល់ប្រទេសមីយ៉ាន់ម៉ាដែលរងគ្រោះដោយសារព្យុះស៊ីក្លូនម៉ូឆាកាលពីពេលថ្មីៗនេះបណ្តាលឱ្យបាត់បង់អាយុជីវិតមនុស្សរាប់រយនាក់ និងខូចខាតទ្រព្យសម្បត្តិនិងហេដ្ឋារចនាសម្ព័ន្ធ នៅក្នុងរដ្ឋរ៉ាក់ខាញនៃប្រទេសមីយ៉ាន់ម៉ា។

ជំនួយមនុស្សធម៌នេះត្រូវបានប្រគល់ឱ្យមីយ៉ាន់ម៉ានៅព្រឹកថ្ងៃទី០២ ខែមិថុនា ឆ្នាំ២០២៣នៅស្តីការក្រសួងការបរទេស ក្រោមអធិបតីភាព រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ លោក ញឹម ខេមរា និងឯកអគ្គរដ្ឋទូតនៃសាធារណរដ្ឋសហភាពមីយ៉ាន់ម៉ាប្រចាំនៅកម្ពុជា លោក អ៊ូ ធីត លីញអូន។

ក្នុងឱកាសនោះ លោក ញឹម ខេមរា បានចូលរួមរំលែកទុក្ខយ៉ាងជ្រាលជ្រៅបំផុតចំពោះផលប៉ះពាល់យ៉ាងធ្ងន់ធ្ងរដល់អាយុជីវិត និងទ្រព្យសម្បត្តិរបស់ប្រជាជនមីយ៉ាន់ម៉ា ហើយសង្ឃឹមថា មីយ៉ាន់ម៉ានឹងអាចជម្នះស្ថានភាពដ៏លំបាកនេះបានឆាប់រហ័ស។

ក្រសួងការបរទេសបានបញ្ជាក់នៅក្នុងសេចក្តីប្រកាសព័ត៌មានថា កាយវិការសប្បុរសធម៌ខាងលើឆ្លុះបញ្ចាំងពីគុណតម្លៃនៃមនុស្សជាតិ ព្រមទាំងចំណងមិត្តភាពនិងសាមគ្គីភាពរបស់ព្រះរាជាណាចក្រកម្ពុជា ជាមួយសាធារណរដ្ឋសហភាពមីយ៉ាន់ម៉ា ដែលកំពុងស្ថិតក្នុងស្ថានភាពដ៏លំបាក សំដៅរួមចំណែកជួយសម្រួលដល់ដំណើរការស្តារប្រទេសឡើងវិញ។

ខ្យល់ព្យុះស៊ីក្លូន Mocha បានកើតឡើងនៅប្រទេសមីយ៉ាន់ម៉ា និងប្រទេសបង់ក្លាដែស នាថ្ងៃទី១៤ ខែឧសភាដែលមានល្បឿនខ្យល់ រហូតដល់ ១៩៥គីឡូម៉ែត្រក្នុងមួយម៉ោង បង្កឱ្យមានមនុស្សជាច្រើននាក់ស្លាប់ និងខូតខាតហេដ្ឋារចនាសម្ព័ន្ធផ្សេងៗជាច្រើនទៀត៕